LAOAG CITY – Kinontra ni Father Randy Manicap, ti pannakangiwat ti KAMMOYO ti KAPIA ditoy probinsya ti panangalay-ay ti panagamak ti publiko seknan iti Balikatan Exercise 2024 iti Sand Dunes, La Paz ditoy ciudad ti Laoag.
Kuna na makapadanag daytoy gapu ta ti war exercise a mapaspasamak ket risiris ti dua nga emperialista a nasyon.
Inpalagip ni Manicap nga addan ti problema ti Pilipinas iti China gapu iti panangag-agaw da ti soberenya ti pagilian no sadinno a sumrek ti Estados Unidos a mangdurdurog iti maysa a giyera.
Inpetteng ni Manicap a no mapasamak ti gubat iti nagbaetan ti dua a pagilyan ket saan nga iti Estados Unidos ti umuna a rauten ti China no di ket ti Pilipinas.
Innayon na a basar iti report ket umad-ado dagiti maar-aramid a bases a pagikabilan kadagiti armas ken dadduma pay a ramit a pakigubat ditoy pagilian.
Mainaig iti daytoy, kuna ni Manicap nga apektado pay ti pagbiagan dagiti mangngalap iti Balikatan Exercise 2024 gapu ta saan da a mabalin ti mapan agkalap iti baybay bayat ti nasao nga aktibidad.
Inpalgak na a basar kadagiti nakasarsarita na a mangngalap ket masapol koma nga adda met ti maipaay kadakuada nga ayuda gapu iti sumagmamano nga aldaw a panagsardeng da a mapan agkalap.
