LAOAG CITY – Ad-adda pay ti pannakapadur-as ti Bamboo Industry ditoy siudad ti Laoag.
Inpakaammo ni Mrs. Perlita Cabello, mangidaulo iti City Social Welfare and Development Office (CSWDO) a daytoy ket babaen ti pannakaiyuswat ti programa nga “Enhancing Bamboo Weaving Skills for Sustainable Livelihood” no sadinno a maipaay kadakuada ti trainings iti panagaramid ti nagduduma a produkto manipud kawayan.
Kunana a dakkel a tulong daytoy kadagiti residente kangrunaan dagiti taga Barangay Balatong ditoy siudad iti panagaramidda kadagiti nagduduma a produkto manipud ti kawayan.
Segun kenkuana, iti babaen ti Balatong Bamboo Weavers Association a maitultuloy latta dagiti pannaka-aramid ti kallugong, kuribot, bag, accessories ti pagtaengan, ken nagduduma pay a local products no sadinno a maallukoy dagiti umili kangrunaan dagiti turista a gumatang.
Kabayatanna, kunana nga agtultuloy latta ti CSWDO, Department of Labor and Employment (DOLE), ken Department of Trade and Industry (DTI) para kadagiti trainings ti pannakailako dagiti produkto a kawayan no sadinno a dakkel a tulong para kadagiti pagbiagan dagiti Laoagueño.
