LAOAG CITY – Nakita ti bangkay ti maysa a senior citizen iti pagtaenganna nga agruprupsan iti Barangay 24 ditoy siudad ti Laoag.
Ti biktima ket agtawen ti 78, awanan asawa ken residente iti nasao met laeng a barangay.
Basar iti Laoag City Police Station, naripar ti maysa a residente nga adda ti nabangsit nga angot nga asideg iti pagtaengan ti biktima.
Gapu iti daytoy, napan immasideg ti maseknan a residente iti pagtaengan ket ditoy a nakitana ti bagi ti biktima nga addan iti estado ti panagrupsa.
Insigida nga inpakaammo ti nakakita daytoy a banag kadagiti opisial ti barangay ken in-report-da iti Laoag City Police Station ken ti Department of Public Safety Paramedics.
Naammoan a basar iti insayangkat a Post Mortem Examination ni Dr. Prescious Eden Garcia-Lim, ti Laoag City Health Officer iti nasao a bangkay ket posible nga addan ti lima nga aldaw a natayen ti biktima sakbay a nakita daytoy.
Kabayatanna, ti rumrummuar a rason ti pannakatay ti biktima ket gapu iti Acute Coronary Syndrome.
