LAOAG CITY – Kinumpirmaran ni Police Capt. Christian Felix, ti chief of police iti ili ti Pasuquin ti maipagarop a panagpaputok ti paltog ti maysa a barangay kagawad iti Barangay Sulongan iti nasao nga ili.
Binigbig ni Felix ti suspek a ni Barangay Kagawad Juan Agoda y dela Cruz, residente iti Barangay Estancia iti met laeng ili ti Pasuquin.
Inbatad ni Felix nga adda ti nagreport kadakuada mainaig iti maipagarop a panagpaputok ti paltog ni Agoda ken iti panagresponde da ket ditoy a natiliw da ti nasao a barangay kagawad.
Nakumpiskar da iti ikot ni Agoda ti maysa a Caliber 45 pistol ngem awan ti nakita da a kapsula ti nasao a paltog iti nadakamat a lugar.
Innayon na nga awan pay ti naipakita ni Agoda a dokumento ti ik-ikutan na a paltog.
Iti agdama, kuna ni Felix nga itultuloy da ti agimbestigar tapno maamoan no pudno a ti barangay kagawad ti nagpaputok ti paltog wenno adda ti nakariri na a possible a nangiduron kenkuana a nagpaputok ti paltog.
Inpakaammo pay ti chief of police a basar iti pannakaeksamen ti barangay kagawad ket saan a nakainom ti nasanger idi napasamak ti insidente.
