LAOAG CITY – Kiniddaw ni Barangay Kagawad Joaquin Fante, ti Barangay Loing iti ili ti Piddig a mailippasen ti Loing-Mangitayag Bridge iti mabiit.
Segun kenkuana, daytoy ket kalpasan a naisardeng ti pannakaaramid ti Phase 1 ti nasao a rangtay idi 2025 nga adda ti nailatang a 30 a milyon a pisos a pundo para iti nasao a proyekto.
Inbatadna a saan a nalpas ti proyekto gapu ta adda pay ti Phase 2 daytoy a kasapulan ti nayon a pundo tapno naan-anay a matuloy ti pannakaaramid ti rangtay.
Inlawlawagna a kalikagumna a mailippasen iti kabiitan a panawen ti nasao a proyekto tapno adda ti pagdalyasatan dagiti residente no sumangbay ti panagtutudo a mangitunda ti panaglayus iti lugar.
Kunana nga apaman a malpas ti rangtay ket dakkel a tulong kadakuada daytoy ken adu ti mabenepisiaran nangruna iti Barangay Bimmanga ken Barangay Tonoton pakairamanan ti Barangay Bagut iti ili ti Dingras.
Naammoan a nangrugi ti pannakaipatungpal ti proyekto idi tawen 2025 ken maibilang a dati a national road ti maar-aramid a rangtay.
Innayonna a saanna met a masinunuo no asino ti kontraktor iti nasao a proyekto.
