LAOAG CITY – Natay ti maysa a baro kalpasan a nagbekkel iti poon ti mangga iti Sitio Casanicolasan, Barangay San Marcelino iti ili ti Dingras.
Nabigbig ti biktima a ni Jonathan Anaya y Palomares, agtawen ti 24, baro, mannalon ken residente iti nadakamat a barangay.
Iti inisyal nga imbestigasyon, napan nakiinom ti biktima agingga iti alas-9:30 idi rabii ken kalpasan iti daytoy ket nagriri da iti inaudi a kabsat na a lalaki a ni Jomel Amaya, agtawen ti 22, baro ken residente met laeng iti nadakamat a barangay, a nagpaot iti sumagmamano nga oras.
Naamoan nga iti oras ti alas-sais itay bigat ket nakigtot laengen ti uliteg ti biktima a ni Primo Anaya, agtawen ti 67 kalpasan a nakita na ni Jonathan a nakabitin iti poon ti mangga ken saanen nga agang-anges pay.
Maipadalan met ti post-mortem examination ti bangkay ti biktima tapno maamoan no adda ti foul play ti pannakatay na.
