LAOAG CITY – Inbatad ni FSUPT. Roxanne Parado, Ilocos Norte Provincial Fire Marshall a naamoandan ti rason ti napasamak nga uram iti Batac City Public Market.
Segun kenkuana, nangrugi ti uram gapo iti maysa nga electrical innature a nangitunda ti maysa nga accidental innature.
Inpettengna nga amin a naalada a sample a wire ken dagiti dadduma pay nga ebidensia ket naipawit iti Fire Arson Laboratory para iti pannakaibigbig ti rason ti uram no sadinno ket naamoan nga electrical innature ti rason ti nadakamat nga uram.
Inlawlagna a basar kadagiti nagdalanan iti puor ket dagiti wirings ti pakagapuananna.
Inpanagetgetna nga awan ti nagkurangan ti Bureau of Fire Protection iti fire safety inspection a segun kenkuana ket sakbay da a palubsosan dagiti indibidual nga agkalikagum iti puestoda ket ikikkanda ida ti fire safety recommendation.
Innayonna pay a kitkitaenda pay ti posibilidad ti uram bayat iti panagtudo iti lugar sakbay a napasamak ti uram ket mabalin nga adda dagiti nabasa a pagsaksakan gapo iti napigsa a tudo a nangitunda ti panagrugi ti uram.
Mainag iti daytoy, pinalubosanda met dagiti store owners nga alaendan dagiti mabalin pay a mausar bayat ti manarimaan a clearing operation a nagbinnulgan ti lokal a gobierno ken ti Department of Public Works and Highways ti District 1 ken 2.
Kabayatanna, kunana a mapattapatta nga umabot ti 129 million dagiti naperdi a goods, appliances ken valuable items dagiti store owners idinto a maipagarup 161 million met ti balor dagiti pasdek a nadadael.
