LAOAG CITY – Umad-adu ti bilang dagiti maparparti a baboy kabayatan nga umas-asideg ti panangsarabo ti baro a tawen.
Daytoy ti inpakaammo ni Mr. Harvey Calamayan, mangidadaulo ti Slaughter House iti ili ti San Nicolas.
Segun kenkuana, manipud iti 40 a bilang dagiti baboy a maparparti iti inaldaw ket dumanonen iti 80 agingga 100 iti kada aldaw.
Inbatadna nga apaman a simrek iti bulan ti Disiembre ket immadon ti bilang dagiti baboy a maparparti.
Inlawlawagna a naiget met ti panangawatda kadagiti maparti a baboy tapno maliklikan ti aniaman a problema.
Kunana a mismo a mapanda sabten iti border control dagiti baboy ken kitaenda amin dagiti dokumento no dimmalan iti umiso a proseso dagitoy.
Innayonna a dagiti kangrunaan a paggapgapoan dagiti maparti a baboy ket manipud iti ili ti Vintar ken Paoay pakairamanan dagiti lugar a naideklara nga African Swine Fever free.
