LAOAG CITY – Umaboten iti 78 dagiti indibidual a naipadamag a natay gapu iti 7.8-magnitude a gingined a timmama iti Mindanao.
Basar iti Situational Report ti National Disaster Risk Reduction and Management Council (NDRRMC), 21 ti nairekord manipud iti Region 11 ken 57 met manipud iti Region 12.
Adda ti 30 nga indibidual met ti naipadamag a mapukpukaw idinto a 1,338 ti nasugatan.
Nagtalinaed nga adda ti sumurok 346,000 a pamilia wenno katukad ti sumurok 1.4 million nga indibidual ti naapektaran ti nasao a gingined.
Adda ti sumurok 4,000 a pamilia wenno sumurok 18,000 nga indibidual ti nagtalinaed iti 45 nga evacuation centers.
Kabayatanna, sumurok 16,000 a pamilia wenno katukad ti sumurok 63,000 nga indibidual ti nakaruaren kadagiti evacuation center.
Adda ti sumurok 74,000 ti nairekord a nadadael a pagtaengan idinto a 774 nga imprastraktura ti nadadael a mapatta-patta nga umabot iti sumurok 148 million pesos.
Agtultuloy ti panangipaay ti tulong ti nagduduma nga ahensia ti gobierno kadagiti naapektaran ti lugar.
