LAOAG CITY – Umaboten iti 19 ti bilang dagiti natay iti nagtipon nga epekto ti monsoon rains ken kadagiti naglabas a bagyo Luis ken Maymay.
Basar iti National Disaster Risk Reduction and Management Council (NDRRMC), karaman kadagiti pimmusay ti 12 nga indibidual gapu iti landslide idiay Baguio, La Trinidad ken Atok, Benguet.
Iti probinsia met ti Rizal, addan ti uppat ti kumpirmado a natay idinto a tallo ti natay idiay Batangas gapu iti landslide, panagreggaay ti daga, pannakakuryente ken natupakan ti kayo.
Nagsagaba ti sugat ti 15 a tattao gapu iti napigsa a panagtudo idinto nga adda ti uppat a mapukpukaw.
Iti agdama, naapektaran ti umabot 2.2 milyon nga indibidual no sadinno nga agtaltalinaed ti evacuation center ti 26,000 a tattao.
Umabot met iti P1.4 billion ti balor iti pannakadadael iti imprastruktura ken P135 million iti agrikultura.
Agtultuloy ti panangipadanon ti tulong dagiti maseknan nga ahensia ti gobierno kadagiti naapektaran a pamilia nga umaboten iti P73.5 million ti naipaay nga assistance.
