LAOAG CITY – Kalikagum ni Sangguniang Panlalawigan Member Joeffrey Saguid a mapaayaban dagiti hog raisers ken dagiti maseknan nga ahensia mainaig iti African Swine Fever wenno ASF virus.
Segun kenkuana, saanna a kayat a maapektaran manen dagiti taraken a baboy ditoy probinsia nangruna ket adda dagiti kabangibang a probinsia nga apektado.
Inbatadna a napinpintas no maprebentaran ngem tay maiyuray pay laeng nga adda ti kaso ti African Swine Fever ditoy probinsia sakbay pay nga agaramid ti addang tapno maprotihiran dagiti agtartaraken ti baboy.
Mainaig iti daytoy, patienna a ti panagtaraken ti baboy ket maysa kadagiti kangrunaan a makatulong ti ekonomia ken mangipangato ti kalidad ti panagbiag nupay itay kallabes ket bimmaba ti presio ti liveweight iti 170-175 a pisos ti kada kilo no idasig idi nga adda pay ti 250 a pisos ti kada kilo.
Gagemna a mamonitor ti panagruar ken panagserrek dagiti taraken a baboy ditoy probinsia babaen ti naiget a pannakabantay dagiti borders.
