LAOAG CITY – Naan-anayen a nairaman iti boxing iti programa ti 2028 Los Angeles Olympics.
Daytoy ket kalpasan a nakagun-od ti unanimous voting manipud iti International Olympic Committee (IOC).
Iti napalabas a bulan, naipaayan ti provisional a pammigbig ti World Boxing tapno mairaman daytoy iti Olympics idiay Los Angeles.
Nagyaman ni International Olympic Committee President Thomas Bach iti maminsan manen a panagsubli ti boxing.
Idi 2024 Paris Olympics ket imatmatonan ti International Olympic Committee ti boxing kalpasan nga inikkat daytoy iti International Boxing Association idi 2023 kalpasan ti kontrobersia kas ti saan nga umiso a panangipatungpal ti panagbalbaliw ken panangipataray iti pinansial.
Inallukoy laengen ti International Olympic Committee ti national boxing federation nga agaramid ti baro a global boxing body a mangsukat iti International Boxing Association.
