LAOAG CITY – Inrugi ti maysa a social media influencer idiay China ti maysa a naidumduma nga awareness campaign no sadinno nga al-allukoyenna dagiti lallaki nga agisuot ti “bra” iti adam’s apple-da.
Iti bidyu ti Chinese social media influencer a ni Zhu Miaolin wenno ad-adda nga am-ammo iti awag nga Ah Miao, ginutigotna dagiti lallaki nga agisuot ti abbong iti Adam’s Apple kas simbolo ti panangsuporta kadagiti isyu maipanggep iti seksualidad.
Inbatad ni Ah Miao, ti Adam’s Apple cover ket maiyarngi iti bra nga us-usaren dagiti babbai tapno abbongan dagiti sensitibo a paset ti bagi.
Kunana a daytoy a panangitandudona ket gagem a kariten ti tradisional a kapanunotan ti komunidad seknan iti panagduma ti seksualidad ken ikkan ti naan-anay nga importansia dagiti pannubok a sangsangoen dagiti babbai idiay China.
