LAOAG CITY – Kinumpirmaran ni Vice mayor Vicentito Lazo ditoy ciudad ti Laoag a nakaawat ti konseho ti surat manipod iti SK chairman ti Barangay Bengcag ditoy ciudad.
Naipalaon iti surat ti nasao nga SK chairman ti panangipila na ti kaso administratibo kontra ken ni SK Federated President Faye Lao ditoy ciudad para iti misconduct ken gross inefficiency resulting to loss of confidence.
Kuna pay ti SK chairman nga iti nasurok a dua a tawen ni Lao iti posisyon na ket awan pay dagiti napapateg a proyekto ken nagdur-asan ti liderato na a mangipakita a saanna a kabaelan ken awan ti ammo na.
Innayon na nga awan pay ti maiyus-uswat a taripnong da gapu iti kaawan ti quorum.
Mainaig iti daytoy, kuna ni Lazo a dagiti kaso administratibo a maipila kontra kadagiti ex-officio members ditoy ciudad ket dumalan iti Office of the President gapu ta isu ti akin-jurisdiksyon.
Nupay kasta, kuna ni Konsehal Jason Perera a malaksid iti Office of the President ket adda ti karbengan ti Sang Panlungsod a mangkita ken mangtratar ti nasao a kaso.
Kabayatanna, immunan a pinadas ti Bombo Radyo nga alaen ti kabibiangan ni Lao ngem saanna a sungsungbatan ti tawag kenkuana.
