LAOAG CITY – Inpakita manen ti Pilipinas ti kinalaingna iti sangalubongan nga entablado ti billiards kalpasan a nangabak ti world champion a ni Carlo Biado iti titulo iti Ho Chi Minh City Open, a naangay idiay Ho Xuan Huong Gymnasium idiay Vietnam.
Nangabak ni Biado kontra ken ni Austrian Mario He babaen iti iskor a 13-8.
Gapu iti daytoy, nagun-od ni Biado ti premio a $ 35,000 wenno nasurok a P1.9 milion, kabayatan a nakagun-od ni He iti $ 13,000 wenno agarup P700,000 kas runner-up.
Inadmitir ni Biado a saan a nalaka ti kapadasanna tapnu magun-od ti balligi, nangruna iti finals, gapu ta nabigbig isuna kas maysa kadagiti kalalaingan a cue masters iti henerasiona.
Iti agdama, daytoy ti maikatlo a major title a nangabakan ni Biado ita a tawen, no sadinno pammaneknek daytoy iti saan nga agsarday a dominasionna iti tay-ak ti billiards.
