LAOAG CITY – Nakasagana ti City Disaster Risk Reduction and Management Office ditoy siudad ti Laoag ti posible nga iduduprak ti tallo a bagyo ita a bulan ti Agosto ditoy pagilian.
Segun ken ni Dr. Melvin Manuel, mangidadaulo iti nasao nga opisina, no sumrek iti Philline Area of Responsibility ti tallo a bagyo ita a bulan ket mangiyuswat dagitoy nga insigida ti Pre-Disaster Risk Assessment wenno tingitingenda a naimbag ti situasion.
Inbatadna a dagiti adda iti flood prone areas wenno low lying areas iti umuna a kitaenda kas iti Barangay 2, 29, Casili, Pila pakairamanan dagiti asideg iti coastal areas kas iti Barangay Gabu, Navotas, Caaoacan ken dadduma pay.
Innayonna nga uray ania a didigra ti sumangbay ket kanayon met a nakasagana ti opisinada tapno alisto ti panagrespondeda kadagiti agkasapulan ti tulong.
Maipalagip a basar iti Philippine Atmospheric, Geophysical and Astronomical Services Administration wenno PAGASA ket posible a sumrek iti Philippine Area of Responsibility ti tallo a bagyo ita a bulan ti Agosto.
