LAOAG CITY – Naiget nga imon-monitor ti City Health Office ken dagiti maseknan nga opisina ditoy siudad ti Laoag, dagiti sumsumrek nga agtrabaho iti Discolandia kas guest relations officers ditoy siudad.
Segun ken ni Dr. Rodrigo Catcatan, mangidadaulo ti City Health Office a sakbay a sumrek dagiti agbalin a guest relations officers iti Discolandia a masapolda a dumalan iti naiget a proseso kas iti panangipasada ti work permit ken birth certificate-da tapno masigurado nga awan ti menor de edad nga agtrabaho iti nasao a lugar.
Kinuna ni Catcatan a tapno maliklikan ti panagtrabaho dagiti nasao a menor de edad ket masapolda a dumalan kadagiti nagduduma a proseso tapno mapaneknekan a mabalinda nga agtrabaho.
Inbatad ni Catcatan a no adda dagiti maduktalan a menor de edad nga agtrabtrabaho iti nasao a lugar ket impasiguradona ti insigida a panag-aksionda ken kasta pay dagiti dadduma pay nga ahensia ditoy siudad kas kadagiti kadagiti City Social Welfare and Development Office, Business Permit and LicenSing Office ken ti Department of Social Welfare and Development wenno DSWD.
