LAOAG CITY – Maragsakan ti City Agriculture Office iti makitkita da nga epekto ti Todamax Vegetable Garden ken Flowering Plants a masarakan iti Brgy. 29, Sto. Tomas ditoy siudad ti Laoag sipud idi nalukatan daytoy iti publiko.
Segun kenni Engr. Sheila Opelac ti City Agriculturist, saan da a namnamaen a kastoy ti agbalin nga epekto na gapu ta maibilang nga experimental laeng daytoy a proyekto.
Gapu iti daytoy ket agtultuloy ti panangmentenar ti Farmers Association iti imahe ti nasao a garden.
Inpakaamo na a maysa kadagiti ar-aramiden da iti agdama ket ti replanting ti sunflowers kasta met ti dadduma pay a sabsabong kas iti zinnia, celosia ken teronia a manamnama a maburas ken mailako iti publiko intun bulan ti Pebrero, nga isu ti selebrasyon ti Pamulinawen festival ken Valentines.
Malaksid iti daytoy, maipalubos pay iti publiko ti mapan ag-vegetable picking.
Innayon na nga ada pay t manamnama a maestablisar a panganan iti uneg ti garden tapno maibilang a complete package ti area.
Maipalagip a nalukatan daytoy iti publiko, ken agpapan ita ket awan pay ti naiyetnag nga entrance fee.
Naammoan nga agarup 3,000 square meters ti kalawa ti nakaimulaan dagiti nagduduma a klase ti nateng ken sabsabong.
