LAOAG CITY – Kalikagom ni Dr. Rodrigo Catcatan, ti Officer in charge ti City Health Office a manayunan ti supply iti Human Papilloma Virus Vaccine wenno HPV vaccine ditoy siudad ti Laoag.
Segun kenni Dr. Catcatan, saan a makaumanay ti 800 vials a naawat da manipod iti Department of Health tapno mabakunaan amin dagiti ubbing nga agtawen ti 9 agingga iti 14 a babbai ditoy siudad.
Inpakaammo na nga agarup 5,500 nga ubbing a babbai ti target da a mabakunaan ti Papilloma Virus Vaccine ditoy siudad ti Laoag.
Gapu iti daytoy, kuna ni Catcatan a plano da ti agkiddaw ti pondo iti gobierno lokal ditoy ciudad tapno magun-od da iti 90% a mabakunaan nga ubbing ditoy siudad .
Mainaig iti daytoy, inpetteng ni Dr. Catcatan a nangrugi iti panagbakuna da idi laeng bolan ti Setiyembre iti napalabas a tawen ngem ti naipaay paylaeng ket ti first dose isut gapuna a kasapulan da iti nayun a bakuna para maikadwa a dose a maipaay kadagiti maseknan.
Inpakaamo na nga agarop 11,800 vials ti kasapolan para iti first ken second dose a panagbakuna dagiti ubbing .
Kuna ni Dr. Catcatan nga iti agdama ket umabot pay laeng iti 48% dagiti nabakunaan nga ubbing nga agtawen ti siyam agingga ti sangapulo ket uppat ditoy siudad.
Kabayatanna, inpaganetget ni Dr. Catcatan ti kinapateg ti panagbakuna iti Papilloma Virus Vaccine tapno masalwadan ti salun-at dagiti babbai.
