LAOAG CITY – Inparuk-aten ni International Criminal Court (ICC) Senior Trial Lawyer Julian Nicholls dagiti co-perpetrators iti maipagarup a panangpapatay iti panawen ti panagserbi kas Mayor idiay Davao City ni dati a Presidente Rodrigo Duterte.
Iti umuna nga aldaw ti confirmation of charges ket inpakitana ti papel ni Senador Ronald “Bato” Dela Rosa nga isu ti nagserbi idi nga hepe ti Davao City Police Office idinto a ni Senador Christopher “Bong” Go ket nagbalin nga special assistant ken adviser idi ni Duterte.
Karaman pay a nainaganan ditoy da dati a Davao police chief Vicente Danao, dati a National Bureau of Investigation (NBI) Davao Regional Director Dante Gierran ken ni Atty. Vitaliano Aguirre II.
Iti Document Containing the Charges (DCC) ket insubmitir ti prosecution nga inparuk-at met ti International Criminal Court kadagiti naglabas a lawas no sadinno a da Go, Dela Rosa, Danao, Gierran ken Aguirre ket innaganan kas co-perpetrators iti panangplano tapno naan-anay a ma-neutralized dagiti kriminal iti babaen ti panangpapatay kadagitoy.
Karaman pay iti dokumento kas co-perpetrators da dati a Philippine National Police chief Oscar Albayalde ken Isidro Lapena.
Kuna ni Nicholls nga adda ti sistema a sursuroten idi ni Duterte no sadinno a nabukel ti Davao Death Squad (DDS).
Inlawlawagna a ti papel dagiti co-perpetrators ket isuda ti mangiyetyetnag ti pammilin manipud ken ni Duterte tapno iwayat ti panangpapatay a dagiti miembro ket dagiti kapulisan pakairamanan dagiti hitmen nga isu ti agar-aramid iti panangpapatay.
Iti maikadua nga aldaw a panagdengngeg ket ibinsa-binsa ti International Criminal Court prosecutors dagiti sumagmamano a detalye dagiti kakunsabo ni Duterte iti pannakaipatungpal dagitoy ti war on drugs.
