LAOAG CITY – Nalpasen ti Commission on Elections (Comelec) ti panagimprenta dagiti opisial a balota para iti naikeddeng nga special election inton Marso 14 iti maikadua a distrito ti Antipolo City.
Mapattapatta nga umabot iti pakabuklan a 252,793 a balota ti naimprenta ti komision.
Naisayangkat ti panagimprenta iti National Printing Office idiay Diliman, Quezon City.
Nangrugi ti test printing iti alas-8 ti bigat, sinaruno daytoy ti opisial a panagimprenta kadagiti balota ken accountable forms iti agarup alas-9 ti bigat.
Immunan nga inrakurak ti poll body a target daytoy a malpas ti produksion iti uneg laeng ti maysa nga aldaw tapno masigurado ti nasao a panangibunong kadagiti election materials.
Naikeddeng ti special election tapno malitopan ti nabakantean a puesto iti maikadua a distrito ti Antipolo kalpasan a pimmusay ni Rep. Romeo Acop.
Manamnama a lumabes iti P6 million ti gastos iti panagimprenta dagiti balota para iti special polls basar iti immunan a projection ti Commission on Elections.
Ti campaign period para iti special election ket agpaut agingga inton Marso 12.
