LAOAG CITY – Mangisayangkat ti Commission on Elections (Comelec) iti forum kadagiti stakeholders ken political parties mainaig kadagiti pagannurotanna iti regulasion ken panagusar iti social media, artificial intelligence (AI), ken deepfakes iti 2025 national and local elections (NLE).
Segun ken ni Commission on Elections Chairperson George Erwin Garcia, maisayangkat ti forum kalpasan ti manamnama a pannakairuar ti guidelines ita a lawas.
Iti napalabas a sumagmamano a lawas, maipalagip nga immunan nga inrebisar ti ahensia dagiti pagannurotan para iti social media, Artificial Intelligence, ken deepfakes.
Padpadasen pay ti Commission on Elections ti mangipaulog iti direktiba maipapan iti pannakausar ti Artificial Intelligence a mangipataw iti umannatop a pannusa kadagiti saan a mangtungpal wenno manglabsing kadagitoy a pagannurotan.
Patien ni Garcia nga iti kampania inton 2025, adu ti agusar Artificial Intelligence, deepfakes, ken dadduma pay a plataporma, karaman ditoy dagiti online platforms.
Mainaig iti daytoy, masapul nga ipakita ti Commission on Elections nga adda ngipen na ken kabaelanna nga ipatungpal dagiti pagannurotan a putaren da, ta no saan, awan ti sumurot.
Kabayatanna, ti addang ket wagas tapno malabanan dagiti peke a damag, di umiso nga impormasion, ken disinformation a mainaig iti eleksion, no sadinno nga insingasing ti Commission on Elections iti en banc a maiparit nga agusar dagiti kandidato iti artificial intelligence ken deepfake inton panagkakampanya.
