LAOAG CITY – Pimmusay ti maysa a contruction worker kalpasan a nabagkong iti Barangay Monte iti ili ti Paoay.
Binigbig ni Police Capt. Eddie Suyat, ti chief of police iti ili ti Paoay, ti biktima a ni Teodolo Oamil Jr.,agtawen ti 46, naasawaan, construction worker ken residente iti nadakamat a barangay.
Inbaga ni Suyat a basar iti inisyal nga imbestigasyon da, kalepleppas a nangan ti biktima iti pangaldaw ken kabayatan nga agtugtugaw iti lamisaan ket simrek ni Eddie Ragus Sr. ken kellaat na lattan a binagkong ti akin-kannawan nga abaga ni Oamil.
Kuna ni Suyat nga adda pay ti dua a kadwa ni Eddie Ragus nga isuda Arman Gaspi ken Erick Ragus ngem nagbati dagitoy iti ruwar a nagserbi a lookout na.
Innayon na a kalpasan ti krimen ket dagus a nagtalapwagaw dagiti suspek babaen ti panaglugan da ti maysa L200 Strada nga agmaris ti gray.
Nagresponde dagiti kameng ti Rural Health Unit (RHU) iti nakapasamakan ti krimen ngem indeklara ni Dr. Alfredo S. Domingo a dead on the spot ti biktima.
Iti panangiyuswat ti manhunt operation dagiti kameng ti pulisya ket naamoan da a napan ti maysa a suspek a ni Erick Ragus iti Barangay Barbar iti ili ti Pinili isut gapuna a nakikoordinar da a dagus iti PNP-Pinili.
Inbatad ni Suyat a nadanun dagiti kakadwa da ni Erick ket inimbitaran da iti PNP-Paoay, simmaruno nga inimbitaran da ni Gaspi.
Inpakammo ni Suyat a kalpasan ti sumagmamano nga oras ket simmuko iti kwerpo ti pulisya ti mismo a bimmagkong iti biktima a ni Eddie Ragus babaen ti panangbayabay kenkuana ti kapitan iti barangay da ken maysa a barangay kagawad.
Rumrumuar nga adda ti dati a susik iti nagbaetan dagiti suspek ken biktima nga isu ti kitkitaen da a possible a maysa a motibo iti insidente.
Nupay kasta, kuna ni Suyat a mangiwayat da pay ti naun-uneg nga imbestigasyon tapno maamoan da no adda pay ti sabali a motibo iti napasamak a pammagkong.
Innayon na nga adda dagiti testigo a naalaan dagiti imbestigador da ti palawag mainaig iti nasao a pasamak.
Iti agdama ket nagtalinaed dagiti suspek iti kustodyar ti PNP-Paoay ken maisagsaganan ti reklamo a murder a maipila kontra kadakuada.
