LAOAG CITY – Naitaray iti ospital ti contractor a ni Pacifico “Curlee” Discaya II tapno dumalan iti operasion iti abaga daytoy.
Inbatad ni Senate Secretary Mark Llandro “Dong” Mendoza nga inaprobaran ni Senate Blue Ribbon Committee chairman Panfilo Lacson ti kiddaw ti kampo ni Discaya.
Kunana a mabalin nga agpaut isuna ti uppat agingga pito nga aldaw iti ospital.
Nakaposas ti ima ni Discaya sakbay nga inruar daytoy iti Senado kas maiyataday iti proseso.
Inpasigurado ti Senate Secretary a naiget a bantayan ti Senate Security ni Discaya kabayatan nga adda iti ospital.
Malaksid iti daytoy, paigetanda pay kadagiti agkalikagum a bumisita manipud alas-8 ti bigat agingga ala-5 ti malem.
Maipalagip a sipud pay idi Setiembre 2025 ket nakabaluden iti Senado ti contractror kalpasan a ma-cite in contempt daytoy ti Senate Blue Ribbon Committee iti panagdengngeg gapu iti anomalya ti flood control projects.
