LAOAG CITY – Inpetteng ni Dr. Eleazar Asuncion, chief of hospital iti Laoag City General Hospital a palso dagiti agwarwaras a damag nga agrikep intuno Disyembre ita a tawen ti nasao nga ospital.
Gapu iti daytoy, kuna na a gapu kadagiti palso a damag ket naapektaran ti operasyon ti ospital nangruna kadagiti agpapaay nga empleado.
Inbatad na nga uray dagiti dati a pasyente nga agpapaagas iti nasao nga ospital ket in-inot payen nga uma-akar iti sabali nga ospital.
Nu pay kasta, inpakaamo na nga adda ti 132 milyon a pisos nga ipaay kas subsidy ti lokal a gobierno ditoy siudad ti Laoag isut gapu na nga agtultuloy latta ti operasyon ti ospital.
Immunan a kinumpirmarana ni Sanggunian Panlalawigan Member Jayvee Baquiran, ti mangidadaulo ti Committee on Health a ti 132 ket sigurado a maipaay iti LCGH.
Kabayatanna, inrakurak met ni Vice Mayor Vicentito Lazo ditoy ciudad ti Laoag a saan ton a ti pondo ti Laoag City General Hospital (LCGH) ti paggapoan ti sweldo dagiti Contract of Service nga agpapaay iti nasao nga ospital aggapon ton iti general fund wenno pondo ti lokal a gobierno ti sweldo dagitoy.
