LAOAG CITY – Inbutaktak ni dati a Department of Public Works and Highways (DPWH) Undersecretary Roberto Bernardo ti maipagarop a panangited ti komisyon kadagiti sumagmamano nga agpanpanday linteg manipud iti proyekto ti flood control.
Inaramid na daytoy kabayatan ti panagdengeg ti Senate Blue Ribbon Committee mainaig iti nasao nga isyu.
Pakairamanan kadagiti dinakamat na ket ni Senador Chiz Escudero, dati a Senador Bong Revilla, Senador Nancy Binay, ken Ako Bicol Party-list Rep. Zaldy Co a karaman iti nasao nga anomalya.
Segun kenni Bernardo, nagdeliver isuna ti 20% manipud iti P800 milyon wenno nasurok-kumurang a P160 milyon kenni Meynardo a maipagarop a para kenni Senador Chiz Escudero.
Iti nadakamat a panagdengeg, inadmitir ni Bernardo a karaman isuna kadagiti iregularidad iti sumagmamano a proyekto ti flood control.
Kageddan iti panangadmitir na ket dimmawat ti pammakawan ken nakasagana a nakasagana nga aramiden na amin tapno maikorehir ti kamali na ken maliklikan a maulit.
Kalpasan ti panangadmitir na, nagpila ni Bernardo ti aplikasyon iti Witness Protection Program ti Department of Justice.
Kiniddaw ni Justice Secretary Jesus Crispin Remulla iti komite a mapalubusan nga itugit na ni Bernardo iti Department of Justice para iti panangadal na iti testimonya nga inaprobaran met ti komite.
