LAOAG CITY – Nagballaag ni dati a Presidente Rodrigo Roa Duterte a no saan a mailawlawag a naimbag ti agdama nga administrasyon dagiti nagbalin a deliberasyon iti nailungalong a pondo para ita a tawen ket saan a rumbeng nga agbayad ti buwis ti publiko.
Segun pay iti dati a presidente, no saan a kabaelan nga ilawlawag ti agdama nga administrasyon ket sayang laeng ti ibaybayad ti publiko kangrunaan na no saan nga ammo ti pakaikabilan dagitoy.
Inpetteng na a saan a maiparbeng nga ibati a blangko ti sumagmamano a paset ti nailungalong a pondo gapu ta saan a maiyataday iti linteg iti pagilian kangrunaan na no ti budget ket inaprubaran ti kangatoan nga opisyal ti Pilipinas.
Innayon ni Duterte a mabalin a pagramutan dagiti irregularidad kangrunaan na ket mabalin nga agpili dagiti opisina ti kantidad a kayatda a mabalin da a nayunan kas reserba.
