LAOAG CITY – Nagkomenton ni dati nga Ako-Bicol Partylist Rep. Zaldy Co mainaig iti pannakairamraman na iti anomalya iti flood control projects.
Iti inparuk-at na a video, inbatad ni Co a nabayag a saan a nagkomento gapo ta maipagarop nga adda ti direkta a bilin kenkuana a saanen nga agsubli iti Pilipinas ken agulimek laengen.
Segun kenni Co, pimmanaw idi Hulyo 19, 2025 para iti medical check-up na ken nakaplano nga agsubli kalpasan ti SONA ni Presidente Ferdinand Marcos Jr.
Nupay kasta, kunana nga idi agawiden ket tinawagan isuna ni dati nga Speaker Martin Romualdez a nangibaga a saan nga agsubli ken isudan ti makammo a maipagarop a bilin ni Marcos isut gapo na a namati daytoy ken sinurot na daytoy.
Inlawlawag na a nautob na a ti kayat a sawen da Romualdez nga isuda ti makammo ket mausar daytoy a “panakip-butas” para iti kampanya da kontra iti kurapsyon ken iti panagswitik da.
Mainaig iti daytoy, kunana a nangrugi daytoy idi timmawag kenkuana ni Sec. Mina Pangandaman kabayatan ti panangrugi ti bicam process iti napalabas a tawen 2024 ken inbaga ti maseknan a maipagarop nga adda ti pammilin ti presidente nga agiserrek ti 100 a bilyon a pisos a balor iti proyekto.
Kunana a kalpasan daytoy nangikeddeng ni Pangandaman ti taripnong kadakuda ni Usec. Adrian Bersamin ken Romualdez iti Aguado Building iti sangwanan ti Gate 4 ti Malacañang, ken adda pay ni Usec. Jojo Cadiz.
Ditoy nga inted kenkuana ni Bersamin ti listaan dagiti proyekto nga agbalor iti 100 a bilyon a pisos a maipagarop nga aggapo kenni Pres. Marcos.
