LAOAG CITY – Nangilatang ti Department of Budget and Management (DBM) ti pondo para iti pannakabukel ti nasurok 5,000 a non-teaching positions iti Department of Education (DepEd).
Daytoy ket kalpasan nga inaprobaran ni Department of Budget and Management Secretary Amenah “Mina” Pangandaman ti kiddaw ti Department of Education a mangparnuay kadagiti kanayonan a posision para iti fiscal year 2024.
Mangnamnama ni Pangandaman a ti tignayda ket mangpalag-an iti trabaho dagiti public teachers iti intero a pagilian.
Inbatad pay ti sekretario a ti direktiba na ket naibasar iti panagkumit ti administrasion ni Marcos a mangipamaysa iti pagsayaatan dagiti mannursuro ken agad-adal.
Inpakaammona a tungtungpalen met ni Presidente Ferdinand Marcos Jr. ti kari na a saan a mabaybay-an ti sektor ti edukasion.
Inlawlawag pay ni Pangandaman a dagiti 5,000 a non-teaching positions iti DepEd ket ti Administrative Officer (AO) II nga addaan ti Salary Grade (SG) 11 para iti fiscal year 2024, ken iti nagduduma nga School Division Offices ken pagadalan iti intero a pagilian.
Innayon ni Pangandaman a dagiti kasapulan a pondo para kadagiti filled positions ket aggapu iti Miscellaneous Personnel Benefits Fund iti Fiscal Year 2024 General Appropriations Act idinto a ti Retirement and Life Insurance Premium manipud iti Automatic Appropriations.
Kabayatanna, tapno maipatungpal ti nadakamat a panggep ket dinakamat ni Pangandaman ti DepEd Order No. 002, s. 2024 a mangmandar iti pannakaikkat dagiti administratibo manipud iti workload dagiti mannursuro a mangipalubos kadakuada a mangipamaysa ti panawenda iti panangisuro.
