LAOAG CITY – Kinumpirmaran ni Ms. Adelei Sarmiento, sanitary inspector ti Rural Health Unit iti ili ti Badoc a naideklara ti dengue outbreak iti dua a barangay iti nasao nga ili.
Segun kenni Sarmiento, ti Barangay Camanga ken Barangay Saud ti nakaideklaraan ti outbreak gapo iti nangato ti bilang ti biktima kadagiti nasao a lugar.
Inlawlawag na nga idi bulan ti Hunyo ket nakaimaldit da ti 36 a bilang ti kaso ti dengue, ken sipud idi Enero agingga idi bulan ti Hunyo ket umaboten ti 64 ti biktima ti nasao a sakit.
Nupay kasta, kuna ni Sarmiento a nakarekobre met laeng dagiti naapektaran ti dengue virus.
Naamoan a 40 a porsiento ti nangatoan ti bilang ti kaso ti dengue ita a tawen no ikumpara itay napan a tawen 2018.
Gapo iti daytoy, ginutigot ni Sarmiento dagiti kailyan na nga agdalos ken siguradwen nga awan ti pagumukan a mabalin a pagitlogan dagiti lamok.
