LAOAG CITY – Mannarimaan ti panagmonitor ti Department of Trade and Industry Consumer Production Division kadagiti nagduduma a pasdek negosyo ditoy probinsya nga imatmatunan Consumer Protection head Mr. Dominador Alberto.
Segun ken ni Alberto, adda 173 ditoy ciudad ti Laoag ti nabisita da sipod idi bulan ti Enero.
Kinumpirmaran na a bayat ti panagsursor da ket adda maysa a pasdek negosyo a naisyuan ti notice of violation gapu ti panaglabsing na iti Republic Act 11900 wenno ti Vape Law ken ti Republic Act 83883 wenno ti Business Name Law.
Kunana a nu pay nakarehistro daytoy ket sabali met ti nakarehistroan na no sadinno a Barangay laeng ti coverage na ken adda iti sabali a lugar ti branch na.
Inpettengna a no saan nga agtulnog ti pasdek iti naited a notice of violation kadakuada ket mabalin nga ipa-revoke ti Department of Trade and Industry Consumer Production Division ti pasdek ken makikoordinar da pay iti biang ti Business Permit and Licensing Office para iti naan-anay a pannusa.
Kabayatanna, nagpalagip ni Alberto iti publiko a no adda madlaw da a saan a nainkalentegan nga aramid dagiti pasdek negosyo ditoy ciudad ket ireport laeng iti opisina da para iti naan-anay nga imbestigasyon.
