LAOAG CITY – Inpasingked ni Atty. Donato Balderas Jr., Schools Division Superintendent ti Department of Education ditoy Ilocos Norte a mangiyuswatda ti maiyannatop a tignay maipanggep iti maysa a mangisursuro iti Apaleng Libtong Elementary School iti ili ti Bacarra.
Segun kenkuana, dagus nga inbilinna kadagiti top officials ti nasao a departamento ti rumbeng nga addang nga aramidenda kalpasan nga adda dagiti sumagmamano a nagannak ti nangipadanon ti report kenkuana maipapan iti daytoy a banag sakbay pay ti panaglukat ti klase.
Inbatadna nga adda ti pammilinna iti Assistant Schools Division Superintendent, Supervisor ken ti Principal nga ikkatan ti load ti maseknan a mangisursuro tapno pagbibingayan pay laeng dagiti dadduma a mangisursuro dagiti subject class daytoy.
Inlawlawagna a maibasar iti kaudian a report a naawatna ket kabayatan nga iyus-uswatda ti nasken a maaramid a tignay ket nagdesision nga ag-leave pay laeng ti maseknan a mangisursuro.
Mainaig iti daytoy, inpanamnama ni Atty. Balderas kadagiti nagannak ti kumpiansa ken respeto dagiti ubbing kabayatan ti panag-leave ti nadakamat a mangisursuro.
Innayonna a nagkari kadakuada ti maseknan a mangisursuro nga aramidenna amin ti kabaelanna tapno saanen a maulit ti napasamak a sumrek isuna a nabartek iti pagadalan.
