LAOAG CITY – Nagballaag ti Department of Education (DepEd) a naiget a maipawil ti bomb threats ken panangitugot dagiti deadly weapon iti uneg kadagiti pagadalan.
Basar iti Department of Education, karaman dagitoy iti kadadagsenan a panaglabsing wenno third-level offenses iti babaen ti baro a Guidelines Ensuring a Safe and Motivating Learning Environment ti ahensia.
Inbatad ni Education Secretary Sonny Angara a saan nga ipalubos ti aniaman a pangta iti kinatalged dagiti agad-adal ken agtultuloy a prioridad ti panagpatalinaed a natalged ken nakappia dagiti pagadalan.
Iti babaen kadagiti pagannurotan, dagiti agad-adal a mapaneknekan a karaman iti bomb threats, panagitugot ti paltog, pagpabettak, ilegal a droga ken dadduma pay a nadadagsen a panaglabsing ket mabalin a saanen a mapalubosan nga ag-enroll iti sumaruno nga school year wenno naan-anay a maikkat iti pagadalan.
Kabayatanna, otomatiko a mai-refer dagitoy kadagiti law enforcement ken social welfare agencies.
