LAOAG CITY – Kinumpirmaran ni Dr. Charito Malicad, Information Officer iti ciudad ti Laoag a naawaten ni Mayor Michael Marcos Keon ti sungbat ti Dept. of Interior and Local Government (DILG) iti palawag na seknan iti reklamo kontra kenkuana.
Ti reklamo ket maipanggep iti maipagarop a saan a panangsurot ni Mayor Keon kadagiti minimum health standard kas iti social distancing ken dadduma pay.
Segun kenni Malicad, adda ti warning ti DILG kenni Mayor Keon gapo ta no maulit daytoy ket posible a saan laengen a ballaag ti maawat na manipud iti ahensya.
Mainaig iti daytoy, kuna ni Malicad a karaman kadagiti nagbalin a palawag ti mayor iti reklamo kontra kenkuana ket paset iti pananglaban ti ciudad iti covid-19 dagiti ar-aramiden na.
Inlawlawag na pay a saan nga agus-usar ni Mayor Keon ti faceshield gapo ta makaapektar daytoy iti panagkita na kas sinertipikaran met ti doktor.
Malaksid iti daytoy, kuna ni Malicad a gagangay nga umasideg ti mayor iti maysa a senior citizen tapno mangeg da ti ibagbaga ti tunggal maysa nangruna ket adda dagiti natataengan a kumaspot met ti panagdengeg da.
Inpetteng na a kanayon met a nakasuot ti facemask ti mayor ken ikkaten na laeng no adda iti uneg ti opisina na.
Inpalgak na pay nga awan ti rason nga agunget ni Mayor Keon iti vaccination rollout a naiyuswat idi iti Barangay Mangato ditoy ciudad ti Laoag a kas iti reklamo a nagwala isuna iti nasao a lugar.
Kabayatanna, kuna ni Malicad a saan a busbusen ti mayor ti oras na tapno ammoen no siasinno ti nagreklamo no diket aramiden na ti trabaho na kas ama ti ciudad.
