LAOAG CITY – Naminsan manen nga inlawlawag ti Department of Health (DOH) a saan nga air-borne disease ti monkeypox virus.
Basar iti Department of Health a maiyakar laeng ti monkeypox iti babaen ti skin-to-skin contact.
Mabalin met daytoy a dagus a maikkat iti babaen ti panagbuggo ti danum ken sabon.
Iti inruar a pagannurutan ti Department of Health a nasken nga ugalien ti panagtalinaed ti hygiene, panag-disinfect kadagiti ramit, panagsuot ti nayon a proteksion iti bagi kas ti long sleeves wenno jackets ken panangliklik nga umasideg kadagiti kontaminado nga ayup kas ti sunggo.
Inabisoan met ti Department of Health dagiti makapaspasar ti sintomas daytoy nga agpakonsultar iti kaasitgan nga ospital.
