LAOAG CITY – Mangnamnama ni Engr. Glenn Miguel iti 1st Engineering District ti Department of Public Works and Highways (DPWH) ditoy ciudad ti Laoag a malpas amin dagiti proyekto da nga agbalor ti 100 a milyon a pisos sakbay nga agngudo ti 2024.
Kuna na a kaadoan kadagitoy ket kalsada, rangtay ken covered court.
Inlawlawag na a dagiti laeng dadakkel a proyekto ti ahensya nga agbalor ti 300 a milyon a pisos agpangato ti possible a saan a malpas ita a tawen.
Inpakaammo na a dagiti dadakkel a proyekto da ket maponpondoan iti kada tawen.
Mainaig iti daytoy, mangnamnama pay ni Miguel a dagiti nadadael nga imprastraktura gapu kadagiti naglabas a bagyo ket maiparuk-at metten ti pondo na ken maiyimplementar ita a tawen.
