LAOAG CITY – Inadmitir ni Mr. Dominador Alberto, ti officer in charge ti Consumer Protection Division iti Dept. of Trade Industry (DTI) a saanen a malapdan dagiti sari-sari stores nga agipangato ti presyo dagiti lako da.
Segun kenni Alberto, daytoy ket iti laksid nga awan pay ti memorandum nga inpaulog ti higher office da mainaig iti kaadda dagiti sumagmamano a basic commodities a ngumato ti presyo na gapo met iti panagngato ti presyo dagiti produkto a petrolyo.
Kunana nga addan dagiti namonitor da a sari-sari stores nangruna iti uneg ti barbarangay a nagipangato ti presyo dagiti lako da.
Rumrumuar a daytoy ket gapo ta ti pannakaibyahe ti produkto manipud iti sentro a paggatangan da ken maiserrek a mismo iti tianggi da nga isu ti saan da a makontrol.
Nupay kasta, kunana nga itultuloy da ti agsursur tapno makita ti presyo dagiti kangrunaan a magatgatang partikular kadagiti dadakkel a supermarkets ditoy probinsya.
Innayon na a daytoy ket tapno masigurado a saan a magungundawayan dagiti tattao.
