LAOAG CITY – Nadegrasia ti dua a nakamotorsiklo iti Brgy. # 7, Alejo Malasig iti ili ti Vintar.
Nabigbig ti driver ti motorsiklo a Suzuki rider a ni Karl Arellano Bueno, agtawen ti 19, awanan asawa ken residente ti Brgy. San Isidro iti ili ti Sarrat idinto a nabigbig met ti nangiturong ti maysa pay a motorsiklo a Mio 125 a ni Mark Angelo Dumanais, agtawen ti 26, naasawaan, construction worker ken residente ti Brgy. Espiritu iti ili ti Dingras.
Basar iti Vintar Municipal Police Station, kabayatan a dumaldalyasat dagiti dua a nakamotorsiklo nga aggapu iti Brgy. Lubnac iti ili ti Vintar ket saanda a naripar ti manarimaan a maar-aramid a kalsada.
Gapu iti daytoy, napukawan ti kontrol ti manibela dagiti maseknan a nakamotorsiklo a nangitunda ti pannakaidungparda iti concrete barrier.
Nagsagaba ti sugat iti nagduduma a paset ti bagi dagiti dua a driver ken naitaray dagitoy iti Gov. Roque B. Ablan Sr. Memorial Hospital.
