LAOAG CITY – Nasapa a nagturong iti Commission on Elections wenno COMELEC ti sumagmamano a residente ditoy siudad ti Laoag iti maudi nga aldaw a panagparehistro para iti Barangay ken Sangguniang Kabataan Elections a maisayangkat inton Nobiembre 2.
Segun ken ni Atty. Julius Balbas, Election Officer ditoy siudad ti Laoag, manipud idi nangrugi ti voter’s registration idi Oktubre iti napalabas a tawen ket umaboten iti sumurok 3,400 a baro a botante.
Inbatadna a nangisayangkatda pay ti satellite registration babaen ti panagturongda kadagiti nagduduma a pagadalan tapno maiyasideg kadagiti umili nangruna kadagiti agtutubo ti karebbengan a makabutos dagitoy inton sumaruno nga eleksion.
Inlawlawagna a naartapanen ti opisinada ti target a bilang a tallo a ribu a makaparehistro ditoy siudad ti Laoag.
Nupay kasta, inpasingkedna nga agtultuloy ti panangakomodarda dagiti agturong iti opisinada ita a maudi nga aldaw ti panagparehistro agingga iti oras ti alas singko inton malem.
