LAOAG CITY – Inbatad ni Maj. Ericson Bolusan, pannakangiwat ti Northern Luzon Command nga agtultuloy ti hot pursuit operation dagiti militar kadagiti miembro ti New People’s Army (NPA) idiay Brgy. Sta Lucia, Candon City, Ilocos Sur.
Kuna na a manipod alas dos idi malem kalman agingga itay parbangon ket agtultuloy ti pinnutok ti paltog iti nasao a lugar.
Segun ken ni Bolusan, dua ti nasugatan ken maysa ti natay a kameng ti militar idinto a dua ti natay a miembro ti NPA gapu iti rinnupak.
Maipalagip a namunganay ti rinnupak iti nagbaetan dagiti kameng ti 702nd Infantry Brigade ken NPA idiay Brgy. Sta. Lucia, Candon, Ilocos Sur kalpasan nga adda ti naipadanon a report seknan kadagiti armado a miembro ti New People’s Army (NPA) nga aglikaw-likaw iti lugar.
Innayun ni Bolusan a posible nga agkurkurangen ti maaw-awat a suporta ti nasao a grupo kalpasan a a naideklarar dagitoy kas persona non grata babaen ti local a gobierno ti Candon isut gapu na nga agsublisubli nga agdawat ti kasapulanda kadagiti residente.
