LAOAG CITY – Nagballigi ni Pinoy pole vaulter EJ Obiena iti Metz Moselle Athletor idiay France.
Daytoy ti umuna a gold medal a nagun-od ni Obiena iti panagserrek ti tawen a 2025.
Ti nasao a panangabak ket maysa a lawas kalpasan a nakagun-od daytoy ti silver medal iti Jump Meeting Cottbus 2025 idiay Germany.
Naala ni Obiena ti 5.70 meters clearance kontra kadagiti pito a dadduma pay.
Ginandat ti World number 4 ti 5.85 meters jump ngem saan daytoy a nagballigi kadagiti amin nga attempts.
Ti 5.70 meters ket ibilangna a season-best tapno magun-od ti umuna a balitok a medalya ti tawen.
Nagtabla met ti Dutch pole vaulter a ni Menno Vloon ngem napaay daytoy iti naiyuswat a tie breaker isu nga adda iti maikadua a puesto.
Adda iti maikatlo a puesto iti nasao a torneo ni Christopher Nilsen ti USA a naka-clear ti 5.60 meters.
Maipalagip a sumagmamano a bulan a naginana ni Obiena kalpasan ti Paris Olympics gapu iti injury iti likud.
