LAOAG CITY – Inbatad ni Vice Mayor Jonathan de Lara iti ili ti Solsona a ninamnama dan ti pannakaibasura ti election protest nga inpila kontra kadakuada ti kampo ni dati a Vice Mayor Bobby Sacro.
Daytoy ket gapu ta ammo da nga awan ti madi nga inaramid da iti napalabas nga eleksyon.
Mainaig iti daytoy, kuna ti bise mayor nga iti baet nga adda ti inpila nga election protest ti kampo ni Sacro kontra iti partido da ket saan nga isu ti nagbalin a lapped iti panagtrabaho da.
Inpasingked na a sipud nagtugaw da ket rinugyan da metten ti trabaho ket panagserbi da kadagiti umili.
Kabayatanna, inpalgak ni de Lara a no kayat ti makikapya ti kampo ni Sacro ket silulukat da latta laketdi naimpapusoan ti pannakikapya da.
