LAOAG CITY – Naarestar ti maysa a lalaki babaen ti anti-illegal drug buy-bust operation babaen ti nagtitipon a pwersa ti PNP-Dingras, PNP-San Nicolas ken PDEU iti Barangay 2, San Baltazar, San Nicolas, Ilocos Norte.
Nabigbig ti suspek a ni Mark Leo Balino, agtawen ti 28, baro, taga Barangay Valdez, Banna ngem agpapaay iti maysa a paglakoan ti lechon manok iti nadakamat a barangay.
Kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos.
Malaksid iti daytoy, nakumpiskar pay dagiti otoridad ti maysa a plastic bag a naglaon ti liempo a nabungon ti aluminum foil nga ayan ti dua nga heat seal transparent sachet a naglaon ti maipagarop a shabu.
Naipan a dagus ti suspek iti probinsya ti La Union para iti pannakaipadalan na iti drug test karaman dagiti naala kenkuana nga ebidensya.
Nupay kasta, naamoan a negatibo ti resulta ti idadalan ti drug test ti suspek.
