LAOAG CITY – Ginutigot ti gobierno ti Estados Unidos dagiti amin nga Amerikano nga adda idiay Lebanon ken Iran nga insigida a tumalaw dagitoy.
Nagballaag ti embahada ti Estados Unidos iti Beirut a ti security situation iti Lebanon ket pabaliw-baliw ken saan a masinunuo gapu kadagiti maiwaywayat nga airstrikes, drones ken rocket attacks iti lugar kangrunaanna iti abagatan ti Beqaa Valley ken sumagmamano a paset ti kabisera ti pagilian.
Napangtaan pay dagiti unibersidad ti Estados Unidos iti rehion no sadinno a posible nga isaruno nga i-target ti Iran dagiti institusion iti Lebanon.
Gapu iti daytoy, inbakwit ti Estados Unidos dagiti agpapaay iti Beirut embassy kagiddan iti kumarkaro a tension iti nagbaetanda iti Iran.
Mainaig iti daytoy, inrekomendar ti embahada ti Beirut a saan nga agbiahe dagiti Amerikano idiay Lebanon idinto a dagiti adda iti pagilian ket rumbeng a tumalawen kabayatan nga adda pay laeng ti commercial flights.
Maipalagip nga agarup 50 a miembro ti embahada ti Amerika ket nabilin a tumalaw iti kabiitan a panawen.
