LAOAG CITY – Inbatad ni Philippine Abassador ken ni Washington Jose Manuel “Babe” Romualdez a kidkiddawen ti Amerika iti Pilipinas nga i-extradite wenno ipaima iti kustodiarda ti religious leader a ni Pastor Apollo Quinoloy para iti pannakausig kadagiti kaso na a sex trafficking ken racketeering a sangsangoenna iti Estados Unidos.
Kuna ni Romuladez a nisubmitiren ti formal requests iti Department of Justice.
Naarestar ni Quiboloy idi Setiembre 2024 iti compound ti Kingdom of Jesus Christ (KOJC) iti siudad ti Davao, gapu iti panaglabsingna iti Republic Act No. 7610 wenno ti Special Protection of Children Against Abuse, Exploitation, and Discrimination Act.
Sumangsango pay daytoy iti kaso a non-bailable qualified human trafficking iti babaen ti Section 4(a) ti Republic Act No. 9208.
Idi Nobiembre 2021, inpakaammo ti Estados Unidos ti pannakaipila ti sex trafficking charges kontra ken ni Quiboloy. Iti kaso, mapabasol ti lider ti relihion a pinilitna kano ti sumagmamano a menor de edad ken agtutubo a babbai a makiseks kenkuana, kasta met dagiti dadduma nga opisial ti simbaan, agraman ti dua nga administrador a nakabase idiay US.
Segun kadagiti federal prosecutors iti Los Angeles, pinalawa ni Quiboloy dagiti alegasion nga immunan a naipila idi 2020 kontra iti tallo nga administrador ti simbaan.
Malaksid iti daytoy, adda pay ti siam a napilaan ti kaso gapu iti maipagarup a pannakipasetda iti maysa nga scheme ti sumagmamano a kameng ti simbaan ti maipagarup a naipatulod idiay Estados Unidos iti babaen ti panangusarda visa manipud iti panangallilaw ken panangipapilitda iti panagkiddaw ti donasion para iti peke a charity para kadagiti ubbing.
