LAOAG CITY – Nagballaag ti Food and Drug Administration (FDA) maipapan iti saan a nairehistro a produkto ti taraon a maawagan iti “Mother’s Favorite Sarsa Rap All-Purpose Sauce.”
Iti sidong ti FDA Advisory No. 2024-1121, inwaragawag ti ahensia a saan pay a nairehistro ti nasao a sarsa ken saan pay a na-evaluate para iti kinatalged ken kalidad.
Mabalakadan ti publiko a liklikan ti panaggatang ken panagusar iti daytoy a produkto ta mabalin a pakaigapuan ti peggad iti salun-at.
Masarakan ti “Mother’s Favorite Sarsa Rap All-Purpose Sauce” iti dadduma a merkado ngem awan ti umno a permit manipud iti ahensia.
Agtultuloy ti panagsubok ti ahensia tapno masigurado ti kinatalged dagiti produkto a taraon ditoy pagilian.
Nagpalagip ti ahensia kadagiti konsumer a gumatang laeng kadagiti produkto nga addaan iti opisial a sertipikasion manipud iti Food and Drug Administration tapno maliklikan dagiti peggad iti salun-at.
