LAOAG CITY – Nabara ti panangsarabo dagiti fans, sumagmamano nga atleta ken kameng ti pamilya dagiti Filipino Olympians iti panagawid da ditoy Pilipinas kalpasan ti pannakipaset da ti Paris Olympics 2024.
Simmangpet ti nagluganan nga eroplano dagiti Filipino Olympians iti Villamore Airbase iti Pasay City iti oras ti alas- 7:07 idi rabii.
Naudi a bimmaba iti eroplano da Aira Villegas, Nesty Petecio ken ni Carlos Yulo.
Da Villegal ken Petecio ket agpada a nakagun-od ti bronze medal idinto a ni Yulo ket dua a gold medals.
Kalpasan ti sumagmamano a minutos a pannakilangen dagiti atleta kadagiti fans ken ipatpateg da iti biag a nangsarabo kadakuada ket nagturong dan iti Palasyo ti Malakanyang no sadinno a ditoy a nabara a sinarabo ida da Presidente Ferdinand Marcos Jr., First Lady Liza Araneta-Marcos ken dagiti dua nga annak da a da Joseph Simon Marcos ken William Vincent Marcos.
Mainaig iti daytoy, inrakurak ni Presidente Marcos a makaawat ti cash incentives dagiti Filipino Olympians a nakipaset ti 2024 Paris Olympics a saan a napagasatan a nakagun-od ti medalya kas panangbigbig iti ado a pinasar da a rigat bayat ti panagtraining da ken ti panangibagi da iti Pilipinas.
Kuna ti presidente a ti kada atleta a saan a nakagun-od ti medalya ket makaawat ti 2-milyon a pisos idinto a ti coaching staff ket maipaayan ti P500.000.00
Naamoan a ti P1 million ket aggapo a mismo iti bulsa ni Presidente Marcos idinto a ti sabali pay a 1-milyon ket aggapo met iti Philippine Sports Commission (PSC).
Kabayatanna, nagyaman met ni Yulo kadagiti amin a nangsuporta kenkuana para iti panagballigi na iti Paris Olympics 2024 a nakagun-odan na ti dua a balitok a medalya.
