LAOAG CITY – Pinaatiddogti Court of Appeals ti freeze order a naipaulog kadagiti bank accounts, sanikua ken dadduma pay nga asset ni Kingdom of Jesus Christ leader Pastor Apollo Quiboloy.
Daytoy ti pinasingkedan ti legal counsel ti Kingdom of Jesus Christ a ni Atty. Dinah Tolentino-Fuentes iti press conference iti siudad ti Davao.
Kinunana, napaatiddog ti freeze order agingga iti Pebrero 3 ti sumaruno a tawen ngem agingga ita kunana a saan pay a naawat ti kampo da ti kopia ti extended freeze order.
Maipalagip nga idi Agosto 5 idi damo a nangipaulog ti Court of Appeals iti 20-day freeze order kadagiti sanikua ti Quiboloy a pakairamanan ti Kingdom of Jesus Christ ken pakairamanan ti media nga ususarenda.
Sakupen ti freeze order ti 10 a bank accounts, pito a real properties, lima a motor vehicles ken maysa nga aircraft a kukua ti Kingdom of Jesus Christ, kasta met ti 47 a dadduma pay a bank accounts, 16 real properties ken 16 a motor vehicles ti Kingdom of Jesus Christ.
Ti nasao a freeze order ket kiniddaw ti Anti-money Laundering Council nga inaprobaran ti Court of Appeals kalpasan a nakasarak iti nainkalintegan a rason a mamati a dagiti bank account ni Quiboloy ket mainaig iti illegal nga aktibidad ken krimen kas iti human trafficking, sexual and child abuse, ken dadduma pay.
