LAOAG CITY – Ginasut a tattao iti Shanghai, China ti nakipaset iti naidumduma a pasalip, daytoy ket ti maturog iti tengnga ti bantay.
Naawagan daytoy ti “Shanghai Chongming Forest Sleeping Challenge 2026” ken naisayangkat iti Dongping National Forest Park.
Nasurok nga 400 nga indibidual ti nagparehistro tapno padasen no kasanu ti kinalaing da a maturog.
Iti uneg ti pito nga oras, masapol nga agtalinaed dagiti partisipantes iti katre da, ken saanda a mabalin ti tumakder, agtugaw, umakar iti pwesto wenno agusar ti cellphone.
Adda dagiti sensor a naikabit iti kada katre tapno marukod ti pitik ti puso, panaganges, garaw ti bagi ken kalidad ti panagturog no sadinno nga isu ti pagibasaran iti maipaay nga “sleep score.”
Ti kaalistoan a maturog ket makaawat ti gunguna a 2,000 yuan, idinto a ti kapintasan ti kalidad ti panagturog ket makaawat ti titulo a “Supreme Sleep God” ken cash price a 3,000 yuan.
Segun kadagiti organizer, gagem ti pasalip a gutiguten dagiti tattao nga ikkan ti importansya ti umdas a panaginana ken ipakita ti kinapateg ti naurnus a panagturog para iti kinasalun-at ti bagi ken panunot.
