LAOAG CITY – Naragsak ken napalaos ti panagyaman ni Ma. Cristine Joy Taliente iti pannakagun-od na ti balitok a medalya iti Athletics-Girls’ U16 400m.
Segun kenni Taliente, narigatan iti laban na ngem inaramid na amin ti kabaelanna ket saan met a nasayang gapo iti balitok a medalya na.
Inlawlawag na a kalpasan ti Palarong Pambasa ket nagtultuloy ti panagensayo da para iti Batang Pinoy.
Mainaig iti daytoy, inbatad met ni Ms. Gladys Abalos, ti coach ni Taliente a saan da a met a ninamnama ti panangabak ti balitok a medalya.
Kunana nga idi 2024 ket bronze ti naala ni Taliente iti isu met laeng a kategorya isut gapo na a napalaos ti ragsak da iti balligi da.
Ti naala ni Taliente a balitok a medalya ket isu ti ummuna a gold medal ti Ilocos Norte iti Batang Pinoy 2025 a maiyus-uswat ita iti General Santos City.
